ނ. ލަންދޫ ސްކޫލްގެ ޕްރިފެކްޓް ޑޭ، ކުލަގަދަ ގިނަ ހަރަކާތްތަކާއެކު ފާހަގަކޮށްފިއެވެ. މި ދުވަސް ފާހަގަކުރުމުގެ މައިގަނޑު މަޤްޞަދަކީ ސްކޫލްގެ ދަރިވަރުންގެ ތެރެއިން ޕްރިފެކްޓުންގެ ގޮތުގައި ހަރަކާތްތެރިވާ ކުދިންގެ ހިދުމަތްތައް ފާހަގަކޮށް، އެކުދިންނަށް ހިތްވަރުދިނުމާއި، އެހެން ދަރިވަރުންނަށް ރީތި ނަމޫނާއެއް ދެއްކުމެވެ.
ޕްރިފެކްޓް ޑޭގެ ހަރަކާތްތައް ފެށިފައިވަނީ ސްކޫލްގެ ހޯލްގައި ބޭއްވުނު ޚާއްޞަ އެސެމްބްލީއަކުންނެވެ. މި އެސެމްބްލީގައި، 2024 ވަނަ އަހަރުގެ އެންމެ ރަނގަޅު ޕްރިފެކްޓުންގެ ގޮތުގައި ފާހަގަކުރެވުނު ފަސް ދަރިވަރަކަށް "ބެސްޓް 5 ޕްރިފެކްޓް" އެވޯޑް ހަވާލުކުރެވުނެވެ. މީގެ އިތުރުން، ސްކޫލްގެ "ސްޓާރ ޕްރިފެކްޓް"ގެ އެވޯޑްވެސް ވަނީ އެވޯޑް ހައްޤުވާ ދަރިވަރަކަށް ހަވާލުކުރެވިފައެވެ. މި އެވޯޑްތައް ހަވާލުކޮށްދެއްވީ ސްކޫލްގެ ޕްރިންސިޕަލާއި އިސްވެރިންނެވެ.
ދުވަސް ފާހަގަކުރުމުގެ ގޮތުން ކުޅިވަރުގެ ދެ މެޗެއްވެސް ވަނީ ބާއްވާފައެވެ. މިގޮތުން، ނ. ކުޑަފަރީ ސްކޫލާ ދެމެދު އެކުވެރިކަމުގެ ހޭންޑް ބޯލް މެޗަކާއި ފުޓްސަލް މެޗެއް ކުޅެވިފައިވެއެވެ. މި މެޗުތަކަކީ ދެ ސްކޫލްގެ ދަރިވަރުންގެ މެދުގައި ގުޅުން ބަދަހިކުރުމާއި، ކުޅިވަރުގެ ރޫހު އާލާކުރުމަށް ބާއްވާފައިވާ މެޗުތަކެއް ކަމަށް ލަންދޫ ސްކޫލުން މައުލޫމާތު ދެއްވައެވެ.
ޕްރިފެކްޓް ޑޭގެ ހަރަކާތްތައް ނިންމާލާފައިވަނީ ހަވީރު ބޭއްވުނު ޚާއްޞަ ސައެއްގައެވެ. މި ސައިގެ ބައްދަލުވުމުގައި، ޕްރިފެކްޓުންނަށް ހަދިޔާ ދިނުމުގެ ރަސްމިއްޔާތެއްވެސް ވަނީ ބާއްވާފައެވެ. މި ހަދިޔާތަކަކީ ޕްރިފެކްޓުންގެ ހިދުމަތްތަކަށް އެއްލި ހިތްވަރެއްގެ ގޮތުގައި ސްކޫލުން ދެއްވި ހަދިޔާތަކެކެވެ. މި ހަރަކާތުގައި ބެލެނިވެރިންނާއި ސްކޫލް މުވައްޒަފުންވެސް ބައިވެރިވެފައިވެއެވެ.
