ނ. ލަންދޫގެ ހުރިހާ މުއައްސަސާތަކެއް ގުޅިގެން ކުޑަކުދިންގެ ދުވަސް ކުލަގަދަކޮށް ފާހަގަކުރުމަށްޓަކައި، ރަށުގެ ބަނދަރު ސަރަޙައްދުގައި ޚާއްޞަ ހަރަކާތްތަކެއް ބޭއްވުމަށް އިޢުލާންކޮށްފiއެވެ. މި ހަރަކާތަކީ ރަށުގެ ހުރިހާ މުއައްސަސާތަކެއް އެކުވެ، އެއް އަމާޒަކަށް މަސައްކަތްކޮށްގެން ކުޑަކުދިންނަށް އުފާވެރި މާޙައުލެއް ބިނާކުރުމުގެ ގޮތުން ރޭވިފައިވާ ކަމެކެވެ.
މި އިޙްތިފާލުތަކުގެ ތެރެއިން ބޭއްވުމަށް ހަމަޖެހިފައިވާ ކުޑަކުދިންގެ ހަވީރުގައި، ރަށުގެ ކޮންމެ މުއައްސަސާއަކުންވެސް އިސްނަގައިގެން ތަފާތު ކުޅިވަރުތަކާއި، މަޢުލޫމާތު ދިނުމުގެ ސްޓޯލްތައް ބެހެއްޓުމަށް ވަނީ ނިންމާފައެވެ. ލަންދޫ ބަނދަރު ސަރަޙައްދުގައި ކުރިއަށްދާ މި ހަވީރުގައި، ކުޑަކުދިންނަށް ޝައުޤުވެރިވާނެ ގިނަ ހަރަކާތްތަކަކާއި ހަދިޔާތައް ދިނުމަށްވެސް ވަނީ ރޭވިފައެވެ.
މުއައްސަސާތަކުން ބުނާ ގޮތުގައި، މިފަދަ ގޮތަކަށް ހުރިހާ އެންމެން ގުޅިގެން މި ދުވަސް ފާހަގަކުރުމުގެ މައިގަނޑު މަޤްޞަދަކީ ކުޑަކުދިންގެ މެދުގައި އެކުވެރިކަން އާލާކުރުމާއި، މުޖުތަމަޢުގެ އެއްބައިވަންތަކަން ކުޑަކުދިންނަށް ދައްކުވައިދިނުމެވެ. އަދި މިއީ ރަށުގެ ތަރައްޤީއަށް މަސައްކަތްކުރާ ހުރިހާ ފަރާތްތަކެއްގެ މެދުގައި އޮތް ބަދަހި ގުޅުން ރަމްޒުކޮށްދޭނެ ހަރަކާތެކެވެ.
މި ހަވީރަށް ރަށުގެ ހުރިހާ ކުޑަކުދިންނާއި ބެލެނިވެރިންނަށް ވަނީ ދަޢުވަތު އަރުވާފައެވެ. މި ހަރަކާތް ވެގެންދާނީ ލަންދޫގައި ފަހަކަށް އައިސް ބޭއްވޭ އެންމެ ކުލަގަދަ އަދި އެންމެ ގިނަ މުއައްސަސާތަކެއް ބައިވެރިވާ އެއް ހަރަކާތަށެވެ.
